5 чэрвеня 2021 з 11.00 да 19.00 Нацыянальны мастацкі музей Рэспублікі Беларусь запрашае на мастацкае свята да Міжнароднага дня абароны дзяцей “PlayArt. Стварай. Адчувай. Пазнавай”.
Дзень абароны дзяцей – адно з настарэйшых міжнародных святаў, якое адзначаецца штогод 1 чэрвеня з 1950 года. Шматлікія культурныя мерапрыемствы, якія арганізоўваюцца ў гэтыя дні ў розных краінах свету, закліканы не толькі забаўляць удзельнікаў, але і нагадваць пра неабходнасць адстойваць правы дзіцяці і дарыць кожнаму маленькаму чалавеку павагу і цяпло.
Мастацкі музей далучаецца да Міжнароднага дня абароны дзяцей з разнастайнай і насычанай праграмай, якая мае на мэце аб’яднаць усіх дзяцей з асаблівасцямі і без, стварыць для іх камфортны і даступны асяродак у музейнай прасторы. Мы прапануем нашым наведвальнікам праявіць і развіць свае творчыя здольнасці, зразумець і адчуць творы мастацтва, узаемадзейнічаць з імі рознымі спосабамі.
У межах мерапрыемства вас чакаюць:
— Майстар-класы ад мастачкі Аляксандры Страшко і скульптара Вольгі Орсік;
— Тэматычныя экскурсіі;
— Інклюзіўныя праграмы з удзелам прадстаўнікоў праекта Belonika Art і школы-студыі “Вышэй за дах”;
— Сустрэча з псіхолагам Мінскага гарадскога цэнтра сацыяльнага абслугоўвання сям’і і дзяце” і работа з метафарычнымі картамі;
— Выстава “Неба. Мора. Аблокі”;
— Творчыя лакацыі для самастойнага баўлення часу дзецям і бацькам.
Кожнага маленькага наведвальніка чакаюць падарункі ад партнёраў свята – кандытарскай фабрыкі “Камунарка” і брэндаў тавараў для дзіцячай творчасці “Цветик” и “Я – художник”. Арт-кафэ “Культурнае жыццё” таксама далучаецца да святкавання з акцыяй “Сок і круасан – усяго за 3 рублі”.
Уваход на мерапрыемства – па білеце ў музей.
Даведкі па тэл.: +375 17 379-45-62, +375 17 342-87-87
Партнёры свята: брэнды тавараў для дзіцячай творчасці “Цветик” і “Я – художник”, кандытарская фабрыка “Камунарка”.
Правядзіце суботні дзень у Мастацкім разам!