З 18 красавіка па 13 мая 2026 года ў Нацыянальным мастацкім музеі Рэспублікі Беларусь будзе экспанавацца выстава «Чарнобыль: 40 гадоў сузірання».
У ноч на 26 красавіка 1986 г. адбылася аварыя на Чарнобыльскай атамнай электрастанцыі. З таго часу мінула 40 гадоў. Мы назіраем наступствы аварыі не толькі на ўзроўні выпаленай зямлі і пакінутых гарадоў, але і ў самай глыбіні чалавечага духу. Гэтыя сорак гадоў ператварылі гістарычную дату ў сакральную дыстанцыю, якая дазволіла нам перайсці ад жаху да засяроджанага ўзірання ў «чорную быль» нашай гісторыі. Гэтае сузіранне — спроба ўсвядоміць, як за чатыры дзесяцігоддзі горыч выпрабавання ператварылася ў ціхую, але нязломную сілу, даказваючы, што там, дзе розум бачыць толькі тлен, дух знаходзіць шлях да ператварэння і вечнасці.
Экспазіцыйны рад прадстаўлены творамі жывапісу, графікі, скульптуры, дэкаратыўна-прыкладнога мастацтва знакавых майстроў і аб’яднаны агульнай лініяй біблейскага апакаліптычнага вобраза «Зоркі Палын» з Адкрыцця Іаана Багаслова.
Выстава жывапісу, графікі і скульптуры беларускіх мастакоў XX-XXI стагоддзяў «Чарнобыль: 40 гадоў сузірання» створана на аснове работ са збораў Нацыянальнага мастацкага музея Рэспублікі Беларусь, Музея гісторыі горада Мінска, фондаў Беларускага саюза мастакоў і прыватных калекцый.
Куратары выставы — Аляксандра Чэчат і Анастасія Мянькоўская, малошыя навуковы супрацоўнік аддзела беларускага мастацтва XX-XXI ст.