З 10 кастрычніка на вялікай галерэі Нацыянальнага мастацкага музея Рэспублікі Беларусь пачне работу выстава жывапісу, графікі, скульптуры беларускага мастацтва ХХ–ХХІ ст. са збору музея, Падчас выставы можна пазнаёміцца з творчасцю мастакоў, якія святкуюць юбілеі і памятныя даты ў 2025 годзе. Творы каля 50 аўтараў трансліруюць разнастайнасць поглядаў і светаадчуванняў, якія мяняліся з дзесяцігоддзя ў дзесяцігоддзе. Нягледзячы на час, які раздзяляе іх, адны майстры падобныя па сваёй мастацкай стылістыцы, іншыя ж, наадварот, працуючы прыблізна ў адзін час, значна адрозніваюцца.
Выстава, прымеркаваная да юбілеяў і памятных дат мастакоў, з’яўляецца своеасаблівым дадаткам да пастаяннай экспазіцыі, у якую ўваходзяць, у першую чаргу, творы найбольш характэрныя для творчасці кожнага з аўтараў. Галоўная ідэя выставачнага праекта прадставіць наведвальнікам творчасць ужо знаёмых майстроў (М. В. Данцыг, Л. А. Дударэнка, Ф. І. Дарашэвіч і інш.), раскрыць новыя грані іх мастацкага пошуку і эксперыментаў, а таксама пазнаёміць з работамі, якія раней не выстаўляліся («Галава яўрэя» І. І.Левіта, «Матросы» Л.П. Дубара, «Павадка» І. В. Карасёва і інш.).
Шэраг майстроў, чые творы прадстаўлены на выставе, не з’яўляюцца выхадцамі з Беларусі. Тым не менш, разам яны ствараюць яскравую і шматгранную карціну беларускага выяўленчага мастацтва.
Выставачны праект дае магчымасць пазнаёміцца з творчасцю прадстаўленых на ёй мастакоў у рамках беларускага мастацтва, якое стваралася на працягу больш як ста гадоў. А таксама з’яўляецца магчымасцю ўбачыць творы, якія вельмі доўгі час не бачыў ніхто, акрамя музейных супрацоўнікаў.