У 2025 годзе Нацыянальны цэнтр сучасных мастацтваў Рэспублікі Беларусь адзначае сваё 10-годдзе. За гэтыя гады НЦСМ заняў сваё асаблівае месца ў культурнай прасторы Беларусі. У сценах цэнтра наведвальнікі знаёмяцца з сучаснымі мастацкімі практыкамі (перформанс, інсталяцыя, відэаарт, science art, саўнд-арт, канцэптуальнае мастацтва і інш.), а таксама міждысцыплінарнымі творчымі праектамі. Але галоўным для нас застаецца фарміраванне ў гледача бачання сучаснага мастацтва, стварэнне прасторы для пражывання вопыту ўзаемадзеяння з ім.
Выставачны праект «Архіў. Прастора паміж...» працягвае серыю маштабных канцэптуальных праектаў НЦСМ.
Арт-аб’екты, жывапіс, інсталяцыі, гук, відэа, скульптура, графіка, перформанс — гэта не толькі мова і форма аўтарскага выказвання, але таксама спосаб сумеснага з гледачом пераасэнсавання рэальнасці, устанаўлення сувязі ў складанай канфігурацыі сапраўднага, вопыту эмацыйнага перажывання.
Архіў становіцца адначасова крыніцай матэрыялу для жэсту мастака, але таксама і стратэгіяй, інструментам фіксацыі «эфемернага», дакументацыяй працэсу стварэння твора, яго трансфармацыі і кантэксту. Паняцце «архіў» таксама адсылае да культурнай пераемнасці і пачуцця прыналежнасці.
Гэтыя думкі, выказванні, галасы запаўняюць прастору экспазіцыі, ствараюць матэрыяльнае, эстэтычнае і сімвалічнае месца для дыялогу і зваротнай сувязі, рэагавання і ўключэння.
Узаемадзейнічаючы з архівамі рэальнымі і ўяўнымі, ператвараючы іх у дынамічную прастору мастацкага даследавання і выказвання, стваральнікі праекта пашыраюць агульнапрынятыя ўяўленні аб памяці, гісторыі, ідэнтычнасці, вяртаюць «страчаныя» і ствараюць і (або) фармуюць новыя ўяўленні і сэнсы.
Асобным праектам у экспазіцыі прадстаўлены 10 твораў з фонду НЦСМ, якія адабралі 10 супрацоўнікаў з розных аддзелаўінстытуцыі. Сярод аўтараў, чые працы аказаліся асаблівымі для кожнага з іх: Мацвей Басаў, Аляксандр Дасужаў, Мікалай Казакевіч, Уладзімір Клімушка, Алег Крошкін, Віктар Пятроў, Уладзімір Правідохін, Мікалай Селяшчук, Валерый Славук, Віталь Цвірка. Гэты суб'ектыўны выбар–кропка ўваходу ў прастору музея, магчымасць яшчэ раз адчуць пачуццё прыналежнасці да гэтай прасторы і стаць часткай працэсу стварэння новага архіва.
Праект працягне працу да 23 лістапада.
Поўны білет — 15,00 руб.
Ільготны білет — 4,00 руб.
Национальный центр современных искусств Республики Беларусь