-
Организатор:
Учреждение «Национальный художественный музей Республики Беларусь»
УНП 100377771
23 жніўня ў Нацыянальным мастацкім музеі Рэспублікі Беларусь адкрываецца выстава «І ты закрасуеш, наш Мінск старадаўнi». Праект знаёміць мінчан і гасцей сталіцы з абліччам горада праз погляд мастакоў пачатку ХХ стагоддзя і да 1968 года.
На сённяшні дзень Мінск носіць званне сталіцы і з'яўляецца адным з буйнейшых гарадоў Беларусі. Калі зірнуць на горад праз прызму часу, то можна заўважыць, як стагоддзе назад аблічча і віды горада моцна адрозніваліся ад вядомага сучаснаму чалавеку гарадскога асяроддзя. На пачатак ХХ ст. Мінск знаходзіўся на складанай геаграфічнай і гістарычнай перыферыі, і ўжо з 1 студзеня 1919 года горад атрымаў главу ў сваёй гісторыі ў якасці сталіцы БССР. Пачынаецца новая эпоха ў жыцці горада.
У 1920–1930-я гг. у Мінск прыбывае ўсё больш і больш новых жыхароў. У гэты перыяд у горадзе працуюць вядомыя архітэктары (Іосіф Лангбард, Георгій Лаўроў і інш.), пры ўдзеле якіх з'яўляецца і новая архітэктура, атрымлівае сваё развіццё і ўся інфраструктура горада. Горад не пакідае раўнадушнымі і мастакоў. Усё больш з'яўляецца розных графічных і жывапісных замалёвак, якія раскрываюць старонкі з жыцця Мінска. Гэты перыяд адлюстраваны ў работах такіх майстроў, як Аркадзь Астаповіч, Язэп Драздовіч, Мікалай Дучыц, Мікалай Тарасікаў, Міхась Філіповіч, Меер Сляпян і інш.
Пасля бурнага «нараджэння сталіцы» прыходзіць Вялікая Айчынная вайна, якая пакінула глыбокі трагічны след у жыцці горада. Разбураны, спалены Мінск і яго руіны сталі адной з галоўных тэм у творчасці мастакоў гэтага перыяду (Аскар Марыкс, Монас Манасзон, Павел Гуткоўскі, Анатоль Тычына).
Не паспелі згаснуць усе вогнішчы вайны, як у горадзе, які 3 ліпеня 1944 года толькі вызваліўся, пачынаецца новы этап — адраджэнне. З новай старонкі горад пачынае складаць сваё аблічча. Паступова аднаўляецца ўся інфраструктура. Мастакі, як рэпарцёры, фіксуюць усе этапы ператварэння горада, пачынаючы з аднаўлення разбураных будынкаў і ўзвядзення новых.Усё часцей вобраз Мінска з'яўляецца на работах майстроў у розных відах мастацтва: у арыгінальнай і тыражнай графіцы, жывапісе, скульптуры, дэкаратыўна-прыкладным мастацтве. У гэты перыяд сапраўднымі «пяснярамі» Мінска становяцца Леў Лейтман, Давыд Генін, Сямён Герус, Ізраіль Басаў, Сяргей Каткоў і інш.
На выставе прадстаўлены работы з фондаў Нацыянальнага мастацкага музея Рэспублікі Беларусь, Дзяржаўнага музея гісторыі беларускай літаратуры, Беларускага дзяржаўнага архіва-музея літаратуры і мастацтва, Нацыянальнага цэнтра сучасных мастацтваў.
Выстава «І ты закрасуеш, наш Мінск старадаўнi» будзе экспанавацца з 23 жніўня па 6 кастрычніка 2024 г. у выставачным корпусе музея (вул. Карла Маркса, 24).
Учреждение «Национальный художественный музей Республики Беларусь»
УНП 100377771