-
Инфолиния:
-
Стоимость билетов:
120 000 – 160 000 руб.
Navi пры падтрымцы «Палацу» адкрые серыю канцэртаў «Заспявай 2.0»
Гурт Navi выступіць на тэрасе кавярні Chill-Out на плошчы Свабоды 19 чэрвеня. Іх выступ падтрымае гурт «Палац» з акустычнай праграмай.
Гурт Navi, аснову якога складаюць Арцём Лук'яненка (22 гады) і Ксенія Жук (22 гады), стаў адным з фіналістаў конкурсу «Заспявай 2.0». Музыкі падалі заяву на ўдзел у двух намінацыях – «Кавер» і «Спяваная паэзія», і ў абодвух былі адзначаныя журы.
На «Кавер» музыкі падалі песню «Жар-птушка» на верш Генадзя Бураўкіна, якую выконваў ансамбль «Сябры». «Мы вырашылі ўзнавіць гэтую цудоўную песню. Пранікнёная, прыгожая кампазіцыя, якая кранае душу, і пра якую, на жаль, мала, хто ведае цяпер. Наша мэта ўзнавіць песню і нават уключыць яе ў канцэртную праграму», – кажа вакалістка Ксенія Жук.
Для намінацыі «Спяваная паэзія» Navi падрыхтавалі твор на верш вядомага беларускага паэта 20-х гадоў XX ст. Паўлюка Труса «Плакалі ветры». «Хоць аўтар не сучаснік, але текст твора абсалютна сучасны і можа адлюстроўваць эмоцыі і перажыванні сучаснага чалавека. Тэма кахання будзе заўсёды актуальнай. Таму лічым, што песня можа быць сучаснай і закрануць слухача», – кажа Арцём Лук’яненка. Navi ўжо выканалі яе на сваім сольным канцэрце пры ўдзеле госця – лідара гурта «Палац» Алега Хаменкі.
Падчас свайго сэта на тэрасе Chill-Out 19 чэрвеня Navi сыграюць свае конкурсныя песні, а таксама абраныя творы з альбому «Сонцам сагрэтыя». Паводле задумы летніх канцэртаў, кожнага фіналіста «Заспявай» падтрымае сваім выступам вядомы гурт. Госцем гэтага вечару стане якраз гурт «Палац», які выступіць пасля Navi з гадзінным сэтам найлепшых песень у акустычным гучанні.
Па выніку летніх канцэртаў маладых выканаўцаў будуць вызначаныя пераможцы конкурсу «Заспявай 2.0», які праводзіць партал Tuzin.fm і фонд «Вяртанне» пры падтрымцы кампаніі «Будзьма беларусамі!». Прызавы фонд конкурсу складае 1000 еўра.
120 000 – 160 000 руб.