Спектакль «Парашутыст‎»

Аляксандр Селін.

Мы жывём у эпоху рызыкі, пастаянна шукаем, як павысіць узровень свайго адрэналіну. Эдвард прафесійна займаецца парашутным спортам. На адным са спаборніцтваў парашут не раскрываецца. З’яўляецца Смерць і пытаецца ў асуджанага Эдварда пра апошняе жаданне. «Запасны парашут...» — са страхам шэпча майстар спорту. Смерць нечакана для сябе дорыць парашутысту жыццё, якое цяпер ён не згодны так проста адпускаць. Але і Смерць не можа адмовіцца ад свайго прызначэння і прымае розныя абліччы, каб забраць героя ў іншы свет. Паступова яна пачынае адчуваць прыцягненне да сваёй «ахвяры». А Эдвард разумее, што жыццё не вечнае і таму трэба карыстацца кожным імгненнем. Чым жа скончыцца гэтае супрацьстаянне паміж чалавекам і містычным персанажам — глядзіце ў тэатры імя Якуба Коласа.

У тэатральнай гісторыі спалучаюцца трагічнасць і камічнасць, гумар і драматызм, гарэзлівасць і прытча. Героі зазіраюць унутр сябе, каб паспрабаваць адказаць на вечныя пытанні: што такое жыццё? што такое смерць? хто такі чалавек паміж жыццём і смерцю?

Пастаноўка Вячаслава Грушова, заслужанага артыста Рэспублікі Беларусь.

Сцэнаграфія і касцюмы Святланы Макарэнка.

Музыка і музычнае афармленне Аляксандра Крыштафовіча.

Пластыка і харэаграфія Ульяны Ацясавай.

Інсцэніроўка і пераклад інсцэніроўкі на беларускую мову Алеся Замкоўскага.

Дзейныя асобы і выканаўцы:

Эдвард — Яўген Бераснёў / Цімур Жусупаў;

Смерць — Ніна Обухава / Вікторыя Шамардзіна;

Гарбуноў, сябар Эдварда — Міхаіл Асаанаў / Раман Волат / Кірыл Гільгенберг;

Валянціна, жонка Эдварда — Аксана Сурвіла / Святлана Сухадолава / Вікторыя Шамардзіна;

Апавядальнік — Георгій Лойка, заслужаны артыст Рэспублікі Беларусь / Юрась Цвірка, уладальнік медаля Францыска Скарыны.