Біблія Князя Радзівіла

26 кастрычніка ў 19.00 на сцэне Рэспубліканскага тэатра беларускай драматургіі пройдзе спектакль “Біблія князя Радзівіла”.

У гэтым годзе спаўняецца 500 год з нараджэння аднаго з самых вядомых дзеячоў XVI стагоддзя князя Мікалая Радзівіла Чорнага. Мікалай Радзівіл Чорны быў лідарам руху Рэфармацыі ў нашай краіне, займаў найвышэйшую дзяржаўную пасаду канцлера Вялікага Княства Літоўскага, заснаваў друкарні ў Брэсце і Нясвіжы. 

Творчы калектыў пад кіраўніцтвам акцёра і рэжысёра Нацыянальнага акадэмічнага тэатра імя Янкі Купалы Паўла Харланчука-Южакова вырашыў зрабіць свой унёсак у адзначэнне 500-гадовага юбілею і паставіць спектакль “Біблія князя Радзівіла”. Дзеі спектакля пачынаюцца ў 1551 годзе. Мікалай Радзівіл Чорны знаходзіцца, здавалася б, на піку сваёй кар’еры, але раптоўна памірае сястра Барбара, каралева польская і вялікая княгіня літоўская, пасля – малодшы брат Ян, з якім у Мікалая былі вельмі складаныя адносіны і яны так і не прымірыліся, нарастае напружанне і неразуменне ў адносінах з жонкай Альжбетай.

Аўтар: А.Унучак.