- Инфолиния:
-
Организатор:
Учреждение «Национальный художественный музей Республики Беларусь»
УНП 100377771
27 чэрвеня 2024 года, а 17-й гадзіне, у Нацыянальным мастацкім музее Рэспублікі Беларусь (вул. Карла Маркса, 24; 4 паверх) адбудзецца ўрачыстае адкрыццё выставы «Мікола Бушчык. Жарсць колеру».
Мікола Бушчык — беларускі мастак-экспрэсіяніст, прадстаўнік айчыннага авангарда, працуе ў жанры пейзажа, тэматычнай карціны, нацюрморта, партрэта. Піша алеем і ў тэхніцы акварэлі.
Мікола Бушчык — адзін з тых мастакоў, якія ў 1980-х гг. стаялі каля вытокаў абнаўлення пластычнай і каларыстычнай мовы беларускага жывапісу, карыстаючыся законамі авангарда.
Карціны мастака — яскравыя і адметныя, складаныя па фактуры і колеры, віртуозныя па ўменні спалучаць адносіны паміж матэрыяльным навакольным сусветам і светам духоўным — эмоцыямі, перажываннямі, мроямі і надзеямі. З дапамогай экспрэсіўнай рытмікі мазкоў пэндзлю, свабоднай кампазіцыі, напружанай лініі жывапісец увасабляе на палатне свае адчуванні і ўласнае разуменне жыцця, праз абстрактныя вобразы і насычаную колерам палітру стварае творы разважліва-філасофскія і глыбока асацыятыўныя, пазнавальныя па аўтарскай пластыцы, адметныя па атмасферы асаблівых мастацкіх пошукаў творцы, напоўненыя святлом і невычарпальнай энергіяй жыцця.
На выставе будзе прадстаўлена больш за 40 жывапісных палотнаў, якія рознабакова адлюстроўваюць творчыя этапы станаўлення аўтарскай манеры пісьма Міколы Бушчыка і прадэманструюць мастацкія пошукі аўтарам «свайго жывапісу», што вызначыла яго прыхільнасць да абстрактнага мастацтва і асацыятыўнай, метафарычнай мовы жывапісу.
Вялікі раздзел выставы будзе прысвечаны акварэлям, якія займаюць значную частку ў творчасці мастака. Экспазіцыя выставы прадэманструе больш за 60 акварэлей. Гэта будзе самая маштабная рэпрэзентацыя графікі Міколы Бушчыка за апошнія 26 гадоў.
Аснову экспазіцый алейнага жывапісу і акварэлей складуць творы з прыватнай калекцыі аўтара і збораў Нацыянальнага мастацкага музея Рэспублікі Беларусь.
У межах выставы пройдуць куратарскія экскурсіі, творчыя сустрэчы з мастаком.
Выстава «Мікола Бушчык. Жарсць колеру» будзе экспанавацца з 27 чэрвеня па 11 жніўня 2024 г. у выставачным корпусе музея (Карла Маркса, 24; 4 паверх).
Куратары выставы — Кузняцова Ганна Уладзіміраўна, старшы навуковы супрацоўнік аддзела замежнага мастацтва Нацыянальнага мастацкага музея Рэспублікі Беларусь. Лісай Юлія Уладзіміраўна, вядучы навуковы супрацоўнік аддзела замежнага мастацтва Нацыянальнага мастацкага музея Рэспублікі Беларусь.
Учреждение «Национальный художественный музей Республики Беларусь»
УНП 100377771