Творчая дзейнасць майстроў беларускага тэатральнага і музычнага мастацтва ў перыяд Вялікай Айчыннай вайны адыграла значную ролю ў мабілізацыі духоўных сіл нашага народа на разгром ворага. Іх задачай было — праўдзіва паказаць, якая небяспека павісла над Радзімай, умацаваць у сэрцах людзей веру і ўпэўненасць у перамозе.
Патрыятычны дух народа ў час смяротнай небяспекі выклікаў творчы ўздым артыстаў беларускіх тэатраў. Некаторыя з іх працавалі ў эвакуацыі, многія ў створаных франтавых брыгадах.
Мэта выставы — раскрыць дзейнасць галоўных творчых калектываў Беларусі ў гады вайны.
На выставачнай зале прадстаўлены экспанаты: фотаздымкі, нотныя рукапісы ваеннага перыяду, дакументы аб дзейнасці канцэртных франтавых брыгад, эскізы дэкарацый і касцюмаў да пастановак Нацыянальнага акадэмічнага тэатра імя Янкі Купалы перыяду эвакуацыі (Томск, 1941-1944).
Асаблівую цікавасць выклікаюць малюнкі заслужанага артыста Беларусі К.Ф. Быліча, акцёра БДТ-1, які загінуў у час чыгуначнай катастрофы пры вяртанні тэатра з эвакуацыі ў Мінск (1944).
Тэма дзейнасці Дзяржаўнага тэатра оперы і балета (сучасны Нацыянальны акадэмічны Вялікі тэатр оперы і балета Рэспублікі Беларусь) у гады вайны паказана матэрыяламі з фонда народнай артысткі Беларусі і СССР Л.П. Александроўскай: фотаздымкі сцэн са спектакляў, перапіска з народнай артысткай Беларусі В. Галінай, асабістыя рэчы артысткі.
Асобнае месца займае комплекс матэрыялаў з архіва сям’і народнага артыста Беларусі Б.М. Пянчука, удзельніка парада Перамогі 9 мая 1945 года ў Маскве на Чырвонай плошчы: асабістыя рэчы, узнагароды, дакументы і фотаздымкі.
Усе экспанаты, прадстаўленыя на выставе з фондаў Нацыянальнага гістарычнага музея Рэспублікі Беларусь.