- Время работы: Ср.- вс.: 11:00 - 19:00
-
Вход:
6,00 руб. – для дарослых
4,50 руб. – для студэнтаў, пенсіянераў
2,50 руб. – для школьнікаў
- Инфолиния:
- Возрастное ограничение: 0+
23 лістапада 2022 года ў 18.00 у Мастацкай галерэі Міхаіла Савіцкага адкрываецца выстава керамікі дванаццаці мастакоў «Па-за часам часу». Сярод удзельнікаў выставы Тамара Сакалова, Ірына Фінцклер, Ірына Раткевіч, Ірына Мойгіс, Леанід Трацэўскі, Алена Чэпелева, Дзмітрый Шкрэдаў, Ганна Амбросава, Вольга Сямашка, Антон Ціханавец, Святлана Кірылюк, Ганна Маршава.
Кераміка з’яўляецца адным з найважнейшых складнікаў традыцыйнага гістарычнага дэкаратыўна-прыкладнога мастацтва Беларусі, мае моцныя традыцыі – і тэхналагічныя, і вобразныя. Звязаная, у асноўным, са стварэннем функцыянальных прадметаў у ранейшыя часы, гэта сфера сёння зведала вялікія змены, пашырыўшы і тэматыку, і вобразны шэраг, увёўшы новыя матэрыялы і смела эксперыментуючы з імі.
Работы, прадстаўленыя на выставе, паказваюць гледачам тую мову пластычнага мастацтва, якая сфарміравалася дзякуючы зліццю ўласцівасцей дэкаратыўна-прыкладной ад керамікі і вобразна-сэнсавай ад скульптуры.
У кантэксце павеваў сучаснасці, калі межы не толькі ўнутры відаў мастацтваў, але і нават паміж абласцямі чалавечай дзейнасці размываюцца, падыходы становяцца ўсё больш смелымі і эксперыментальнымі, важным становіцца паказаць гэтыя метамарфозы на айчынным полі культуры і мастацтва. У дадзеным выпадку – керамікі.
У мастацтвазнаўчай літаратуры адсутнічае дэфініцыя малой скульптуры. Як няма і адзінага меркавання ў пытанні аб тым, ці з’яўляецца дробная пластыка (да якой можна аднесці і керамічныя вырабы) скульптурай або дэкаратыўна-прыкладным мастацтвам. Вядомы культуролаг М. С. Коган зазначаў, што неразуменне прынцыповага адрознення прыкладнога мастацтва ад выяўленчага прыносіць вялікую шкоду. Але сёння ў гэтым сінтэзе мастацтваў бачыцца, наадварот, вялікі патэнцыял і складаны працэс стварэння новых форм і відаў мастацтва. Калі слова «кераміка» перакладаецца з грэчаскай як «гліна», і сёння пад гэтым значэннем разумеецца гліна, якая прайшла абпал, то дзе тая грань паміж керамікай і скульптурай?
Мэтай дадзенай экспазіцыі з’яўляецца вызначэнне і выяўленне ўласцівасцяў керамічнай скульптуры або скульптурнай керамікі як памежнай сучаснай з’явы.
Уласцівасці скульптуры – аб’ёмы, рытмы мас і прапорцый, чаргаванне дэталяў, метафарычныя і абагульненыя вобразы – даўно належаць не толькі манументальнаму скульптурнаму твору. Погляд на пэўную рэч, з’яву, суб’ект і выраз яго ў матэрыяльнай форме ўласцівы і творам керамістаў. Раскрыццё сутнасці вобразаў, адлюстраванне светапогляду, думак праз мову формы выводзіць работы керамістаў у поле мастацкае і менш функцыянальнае.
Удзельнікі выставы, з’яўляюцца не толькі рамеснікамі (хоць і дадзены бок прафесіі, несумненна, важны), але і знаходзяць у матэрыяле спосабы і прыёмы для адлюстравання думак, ідэй, аўтарскай задумы.
У іх творах можна знайсці як функцыянальныя і дэкаратыўныя характарыстыкі, так і характарыстыкі станковай формы, калі твор носіць самастойны характар, неўтылітарны і недэкаратыўны, адрозніваецца псіхалагізмам, апавядальнасцю, сімвалічнасцю і метафарычнасцю. Такім чынам, работы ўдзельнікаў выставы можна аднесці да малой пластыкі. У адрозненне ад манументальных скульптурных прац, яны камерныя, і такім чынам бліжэйшыя гледачу: іх можна дэталёва разгледзець зблізку, вывучыць пластычныя і тэхналагічныя знаходкі аўтара, адчуць, як арганізоўвае вакол сябе прастору аб’ект, і такім чынам усталяваць прамы кантакт са стваральнікам твора.
Сярод аўтараў, работы якіх плануецца экспанаваць, сабраны як маладыя прадстаўнікі прафесіі, якія зусім нядаўна скончылі Беларускую дзяржаўную акадэмію мастацтваў, так і мэтры гэтай сферы. Гэты сінтэз прафесіяналаў розных пакаленняў, якія размаўляюць на адной мове вобразаў, якія карыстаюцца адным метафарычным падыходам, таксама цікавы: у гэтым раўнапраўным прадстаўленні прац і дасведчаных майстроў, і тых, хто толькі распачаў свой шлях у прафесіі, ёсць момант пераемнасці традыцый і моцнай супольнасці прафесіяналаў.
6,00 руб. – для дарослых
4,50 руб. – для студэнтаў, пенсіянераў
2,50 руб. – для школьнікаў