-
Стоимость:
1,00 (10 000) руб.
27 жніўня а 16-й у неверагодным доме Якуба Коласа ўсё будзе па іншаму! Дзяржаўны літаратурна-мемарыяльны музей класіка прапануе правесці апошнюю суботу лета Года культуры і заклікае: “ПаКаласімся!” разам у добрай кампаніі!”
У гэты дзень, апроч унікальнай атмасферы і гістарычных артэфактаў знакамітага гаспадара, на Коласаву сядзібу завітаюць адметныя госці, мэта якіх – навучыць гасцей імпрэзы каліву свайго майстэрства. І абыдзецца гэты неацэнны творчы і адукацыйны досвед гасцям установы ўсяго ў 1 рубель – дарэчы, акурат такім наміналам ў свой час адзначыў бацька ЯкубаКоласа яго першы верш.
Такім чынам, прайсці шляхам Якуба Коласа на Акадэмічнай, 5 і стаць удзельнікам майстар-класаў можна ўжо а 16-й.
Скульптар Павел Вайніцкі навучыць працаваць нават з самым нязграбным матэрыялам і рабіць з яго “трэш”-скульптуры. Увага: матэрыял для іх можна прынесці з сабой!
Скульптар-асілак Сяргей Кляшчук засведчыць, як за кароткі час стварыць драўляную пластыку нават навічку ў гэтай справе.
Мастак Андрэй Дубінін распавядзе і пакажа, як звышрэалістычна выпісваюцца выявы рук і ног, у тым ліку, на творах рэлігійнага зместу.
Мастак Алесь Квяткоўскі, гуру “мядовых” карцін, здзівіць сакрэтамі іх тэхналогіі, а поруч зладзіцца дэгустацыя і выстаўка-продаж мёду.
Гітарыст Леанід Нарушэвіч з гурта “Князь Мышкін” прадэманструе гітарную інтуітыўную імправізацыю. 19 00 --20 00
Музыкант Уладзімір Дрындрожык навучыць “музыцы дажджу”.
Знакаміты і няўлоўны “Спеўны Сход” прызямліцца ля сядзібы ў цэнтры Мінска і абяцае навучыць правільна дыхаць і спяваць родныя песні – як народныя, так і на вершы Якуба Коласа.
У праграме апошняй суботы лета Года культуры і флэш-моб ад часопіса “Мастацтва” пад назвай “Зрабі сваё “Мастацтва”!”
А пасля адукацыйнай праграмы гасцей сядзібы чакае прагляд кароткаметражных стужак маладых беларускіх рэжысёраў ва ўтульнай гасцёўні самога Якуба Коласа на другім паверсе сядзібы-музея.
Класіка і традыцыі могуць быць цікавымі, калі спасцігаеш іх знутры!
Інфармацыйны партнёр праекта “ПаКаласімся!” – рэдакцыя газеты “Культура” рэдакцыйна выдавецкай установы "Культура і мастацтва".
САРДЭЧНА ЗАПРАШАЕМ!
Адрас музея: г. Мінск, вул. Акадэмічная, 5
Тэл. для даведак: 284-15-84, 284-17-02
1,00 (10 000) руб.