Напярэдадні Новага года, 29 снежня а 17-й гадзіне Нацыянальны гістарычны музей Рэспублікі Беларусь прэзентуе ўнікальны музейны прадмет. Гэта мемарыяльная рэч, якая мае непасрэднае дачыненне да аднаго са знакамітых родаў Беларусі – роду Агінскіх. Акрамя таго, срэбны кубак – цікавы прыклад сувенірнай прадукцыі, вырабленай у другой палове 19 стагоддзя.
У 2013 годзе 37-я Генеральная канферэнцыя ЮНЕСКА прыняла рашэнне ўнесці ў Каляндар памятных дат на 2014 – 2015 гады 250-годдзе з дня нараджэння Міхала Клеафаса Агінскага – нашага суайчынніка, кампазітара, літаратара. У сувязі з гэтай падзеяй музей арганізаваў шэраг выстаў, прыняў удзел у стварэнні экспазіцыі ў маёнтку Агінскага ў Залессі. Прэзентуемы кубак ставіць кропку ў шэрагу мерапрыемстваў, якія адбываліся з нагоды 250-годдзя нашага вялікага суайчынніка.
Кубак выраблены на высокім прафесійным і мастацкім узроўні ў Германіі ў 1870-х гадах са срэбра 13 лотавай пробы, што адпавядае сучаснай 812,5 пробе. На ім выгравіраваны выявы гербаў “Брама” (належаў роду Агінскіх) і “Гржымала” (належаў роду Патуліцкіх). Надпіс на польскай мове: “Шлюбны падарунак ад дабразычлівых служачых і лясных стражаў. Рэтаў, 16/28 красавіка 1877 года” сведчыць пра значную падзею ў гісторыі сем’яў Агінскіх і Патуліцкіх – кубак падараваны Багдану Іерынеевічу Агінскаму, унуку Міхала Клеафаса Агінскага з нагоды яго шлюбу з графіняй Габрыэлай Марыяй Патуліцкай.
Набыццё гэтага твора адбылося пры падтрымцы генеральнага партнёра Нацыянальнага гістарычнага музея Рэспублікі Беларусь кампаніі JTI (Japan Tobacco International) у Рэспубліцы Беларусь.
Супрацоўніцтва Нацыянальнага гістарычнага музея і кампаніі JTI працягваецца з 2010 года. За гэты перыяд было паспяхова рэалізавана больш за 40 значных праектаў, у тым ліку дзеючая зараз выстава «Гандаль Беларусі на шалях гісторыі», цыкл мерапрыемстваў, прысвечаных 200-годдзю Іосіфа Гашкевіча, выставы «Беларусь і яе суседзі», «Вайна 1812 года ў гісторыі Мінска» і многія іншыя. Супрацоўніцтва ажыццяўляецца па такіх накірунках, як выставачная, інфармацыйна-выдавецкая, рэстаўрацыйная, культурна-адукацыйная, дабрачынная дзейнасць, набыццё музейных экспанатаў, умацаванне матэрыяльнай базы музея.