Ці магчыма сёння супрацьпастаўляць актуальнае мастацтва сучаснаму? Што з нашага актуальнага трапіць у падручнікі па гісторыі мастацтваў заўтра? Што застанецца нашчадкам? Якія артэфакты?
Актуальнае мастацтва азначае перавагу ідэі над майстэрствам выканання. Яно перастала апераваць паняццем прыгожае. Мастацтва сёння — гэта сродак пазнання свету, форма роздуму і фіксацыя назіранняў за ім, а не проста эстэтычны аб’ект. Стала модным крытыкаваць арт-інстытуцыі, ганіць супрацоўніцтва андэграўнда з праўладнымі структурамі.
Прагрэсіўнымі лічацца мастакі, якія знаходзяцца ў сталых пошуках новай эстэтыкі і вобразаў. Адмова ад пазнавальнага стылю, творчасць у разнастайных медыя ставяць эстэтычны вопыт вышэй за фактычнае значэнне арт-аб’екта.
Адпаведна прадстаўнікоў сучаснага фігуратыўнага жывапісу папракаюць у рамесніцтве і называюць іх «інтэр’ернымі жывапісцамі». Усё, што «прыгожа» — гэта дызайн і ўтылітарнасць. Але наколькі справядлівыя гэтыя папрокі? Ці перажыве нашае актуальнае мастацтва нашае актуальнае сёння?
21 лютага пра гэта будуць разважаць беларускія мастакі, што прадстаўляюць розныя жанры і накірункі сучаснага мастацтва: Сяргей Грыневіч, Уладзімір Качан, Юрый Якавенка.