У Віцебску распачынаецца курс адукацыйных сустрэчаў для моладзі. Цягам лістапада ў горадзе пройдуць 4 сустрэчы з экспертамі ў розных сферах культуры, якія паспрабуюць распавесці толькі самае сучаснае і цікавае пра беларускую культуру. Курс імпрэзаў разлічаны на школьнікаў, студэнтаў і актыўную творчую
моладзь, а таксама ўсіх, хто хоча даведацца больш пра культурныя з’явы і
падзеі ў сучаснай Беларусі.
8 лістапада
8 лістапада ў Цэнтры сучаснага мастацтва упершыню ў Віцебску можна будзе ўбачыць спектакль Андрэя Саўчанкі «Бі-лінгвы, ці Кураня з сэрцам». Сам аўтар кажа, што «Бі-лінгвы — тэкст пра чалавека паміж 2-х культур, 2-х моў, 2-х сусьветаў. Праз свае стаўленне да мовы герой спрабуе спазнаць сябе, сваё месца ў гэтым свеце, свой час у гісторыі».
Тэкст «Бі-лінгвы, ці Кураня з сэрам» атрымаў дыплом Х інтэрнацыянальнага фестывалю студэнцкіх тэатраў «Тэатральны Куфар» (2013) за ўдзел у праекце «КуфарДрамаЛаб» і перамог у конкурсе «Сучасная Беларуская Грамадзянскасць» (2013).
15 лістапада
15 лістапада ў антыкавярні Time-out пройдзе паэтычная сустрэча курса, экспертамі якой выступаць ужо вядомыя ў Віцебску Уладзь Лянкевіч і Андрэй Хадановіч. Эксперты не толькі раскажуць пра сваю творчасць, але і паспрабуюць прааналізаваць стан сучаснай беларускай літаратуры, падыскутаваць з віцебскай публікай.
22 лістапада
22 лістапада антыкавярня Time-out прымае ў госці беларускі рок-гурт Re1ikt, таксама знаёмы віцебскай публіцы. Хлопцы рыхтуюць невялікі акустычны канцэрт, збор лепшых твораў, якія адлюстроўваюць філасофію гурта.
Re1ikt — сапраўды зоркі на беларускай рок-сцэне: без іх не абыходзіцца ніводзін фестываль ці канцэрт. Сярод твораў музыкаў не толькі ўласныя, але і творы беларускай літаратуры, пакладзеныя на музыку.
30 лістапада
Апошняя сустрэча курса адбудзецца 30 лістапада ў антыкавярні Time-out , куды завітае мастацтвазнаўца і пісьменнік Артур Клінаў, які прааналізуе для віцебскай публікі самыя яркія з’явы і падзеі ў сферы сучаснага беларускага мастацтва.
Кантакты для сувязі: +375 (29) 353-01-96 (Вікторыя).