21 лістапада а 16-й гадзіне Дзяржаўны літаратурна-мемарыяльны музей Якуба Коласа запрашае ўсіх аматараў беларускай літаратуры на прэзентацыю новай кнігі Людмілы Рублеўскай “Рыфма коштам у жыццё…”.
Людміла Рублеўская – шматгранная таленавітая асоба: пісьменніца, крытык, журналіст, культурны аглядальнік газеты “СБ – Беларусь сегодня”, кiруе суполкай маладых творцаў "Лiтаратурнае прадмесьце". Літаратурную дзейнасць яна абрала ў выніку ваганняў паміж двума захапленнямі: уласна літаратурай і маляваннем. Пачала выступаць у друку з лірыкай, але хутка адчула абмежаванасць паэтычнай прасторы для свайго таленту і паступова перайшла да драматычных паэм на гістарычную тэматыку, а затым і да прозы. Людміла Рублеўская малюе яркія вобразы беларускай гісторыі X–XX стагоддзяў, раскрываючы для чытача свет вялікай і багатай духоўнай спадчыны.
У сваёй новай кнізе-эсэ па гісторыі беларускай літаратуры пісьменніца жыва і займальна распавядае пра тых, хто ствараў нашу літаратуру, у тым ліку і пра тых, хто не ўваходзіць у школьную праграму; хто, можа быць, проста падараваў нам прыгожую легенду, як Леся Украінка і Сяргей Мяржынскага; хто даследаваў духоўную спадчыну беларускага народа, як Каятан Касовіч, Сержпутоўскі і Даленга-Хадакоўскі.
Выдатна, калі дзякуючы гэтым эсэ хтосьці адкрые для сябе новае імя, зірне па-іншаму на агульнавядомыя факты, захоча прачытаць беларускую кнігу. На сустрэчу запрошаны беларускія літаратуразнаўцы, гісторыкі, пісьменнікі, публіцысты, крытыкі, журналісты.
Тэл. для даведак: 284-15-84, 284-17-02
Афіцыйны сайт: www.yakubkolas.by
Все события твоего города в мобильном приложении relax.by. Найди «relax.by» в своем маркете: App Store, Google Play!