14 мая 2011 года з 1400 да 2400 у Дзяржаўным літаратурна-мемарыяльным музеі Якуба Коласа адбудзецца святочнае мерапрыемства "Святло ў вакне", прымеркаванае да Міжнароднага дня музеяў.
Першымі музей прыме ўдзельнікаў заключнага канцэрта ІІ фестывалю юных талентаў "Сымонкавы нашчадкі", які збярэ выхаванцаў музычных школы Міншчыны. Свята стала магчымым дзякуючы ініцыятыве Дабрачыннага савета пры музеі Якуба Коласа.
Працягам свята стане акцыя "Званы Вялікай Перамогі", прысвечаная 70-годдзю пачатку Вялікай Айчыннай вайны, у ходзе якой адбудзецца прэзентацыя зборніка "Защитники родной страны" выдавецтва "Энцыклапедыкс".
У рамках "Ночы музеяў – 2011" пройдзе адкрыццё выстаўкі з уласных фондаў музея "Наш Мінск старадаўны, прыгожы, магутны і слаўны", прымеркаванай да 90-годдзя прыезду Якуба Коласа на пастаяннае жыхарства ў горад Мінск. Увагу наведвальнікаў, безумоўна, прыцягне выстаўка нумізматычнай калекцыі слыннага калекцыянера з радзімы Якуба Коласа, старшыні Дабрачыннага савета пры музеі Якуба Коласа А. В. Грэкава.
У 2011 годзе ў музеі стартаваў праект "Мы родам з СССР", які прысвечаны яркім прадстаўнікам краін постсавецкай прасторы. Пры непасрэднай падтрымцы адпаведных таварыстваў дружбы і культурных сувязей праходзяць літаратурна-этнаграфічныя вечары, мэта якіх – прапаганда нацыянальнай культурнай спадчыны краін з былых рэспублік Савецкага Саюза праз паэтычнае слова і музыку, народныя традыцыі, жывы міжкультурны абмен. На "Ночы музеяў – 2011" у Доме Коласа ў рамках ўзгаданага праекта пройдзе канцэртная праграма "Сяброўства вузы кроўныя": прэзентацыя Мінскага гарадскога армянскага культурна-асветніцкага таварыства "Айастан" і Міжнароднага грамадскага аб’яднання "Татара-башкірская культурная спадчына "Чышма". Падчас мерапрыемства адбудуцца выступленні фальклорнага армянскага ансамбля "Эрэбуні" (мастацкі кіраўнік Рузана Аванесян) і фальклорнага татара-башкірскага ансамбля "Лейсан" (мастацкі кіраўнік Гульсіна Аброськіна), а таксама пройдзе прэзентацыя нацыянальных вырабаў, сувеніраў, страў нацыянальнай кухні.
Сапраўднай аздобай вечара стане дабрачынны канцэрт "Шэдэўры еўрапейскага барока" ансамбля "Камерныя салісты Мінска" пад кіраўніцтвам Дзмітрыя Зубава, таленавітага арганіста, клавесіста, дырыжора з Пецярбурга, які добра вядомы мінскай публіцы па працы з Дзяржаўным Камерным аркестрам, ансамблем "Класік-авангард" і ў Нацыянальным акадэмічным Вялікім тэатры оперы і балета Рэспублікі Беларусь. У праграму канцэрта музыкі ўключылі творы кампазітараў XVII–XVIII стст. – такіх як Г. Ф. Тэлеман, І. Г. Гольдберг, А. Скарлаці, Г. Ф. Гендэль і інш. Усе сродкі ад канцэрта будуць накіраваны на стварэнне скульптурнай кампазіцыі "Якуб Колас. Роздум" для ўстаноўкі на мемарыяльнай сядзібе музея.
Заключным акордам ночы стане адкрыццё рэтра-танцпляцоўкі ў стылі 1950-х гадоў "Ноч стыляг" з удзелам гурта "Crazy Steaks" (сайкабілі) і Лёхі Чыканаса (кактус-бугі).
Праграма святочнага мерапрыемства "Святло ў вакне"