Памінальная малітва

Нацыянальны акадэмiчны тэатр iмя Янкi Купалы

Камедыя ў 2-х частках паводле твораў Шолам-Алейхема.

Працягласць – 3 гадзіны
Прэм’ера – 21 мая 1989 года

Рэжысёр – Барыс Эрын
Мастак – Барыс Красноў
Кампазітар – Аляксандр Рэнанскі
Балетмайстар – Сямён Дрэчын

Камедыя “Памінальная малітва” вось ужо на працягу многіх гадоў займае асобнае месца ў рэпертуары тэатра і нязменна карыстаецца асаблівай увагай і пашанай гледачоў.

На сцэне перад вачыма праходзіць амаль біблейская гісторыя, у якой бяруць удзел Бацька, што працай здабывае хлеб надзённы; Маці, якая дорыць жыццё, захоўвае хатні агмень; пяць дачок – святло і радасць сям’і. Галоўны герой – Тэўе-малочнік, якога местачкоўцы надзвычай паважаюць, – тутэйшы філосаф, клапатлівы бацька, што стаіць на чале вялікага роду, уладар старой кабылы і дзвюх кароў, руплівы вясковы гаспадар, катораму ўсё не шанцуе, але нічога, неяк жывецца, бо дапамагае ў цяжкую хвіліну гумар, вялікая любоў да жыцця і шчырая вера ў Бога. Персанажы спектакля – прадстаўнікі розных нацыянальнасцей – жывуць разам, дружна і не ўяўляюць, што можа быць інакш…