Спектакль «Біблія князя Радзівіла» прысвечаны 500-гадоваму юбілею Мікалая Радзівіла Чорнага (1515 ‑ 1565), ‑ аднаго з самых вядомых гістарычных дзеячаў Беларусі XVI ст.
Мікалай Радзівіл Чорны займаў найвышэйшую дзяржаўную пасаду канцлера Вялікага Княства Літоўскага. Ён заснаваў першую на тэрыторыі сучаснай Беларусі друкарню ў Брэсце (1553 г.), у 1563 г. ‑ надрукаваў славутую Берасцейскую Біблію. Як фактычны кіраўнік Вялікага Княства Літоўскага, Мікалай Радзівіл Чорны спрычыніўся да адной з самых удалых эканамічных рэформаў у нашай гісторыі – Валочнай памеры (1557 г.), а таксама да падрыхтоўкі другой рэдакцыі Статута ВКЛ (1566 г.). Імя Мікалая Радзівіла Чорнага ўнесена ў падручнікі па гісторыі нашай краіны. У 2009 г. у г.Брэсце быў устаноўлены помнік гэтаму славутаму дзеячу гісторыі і культуры Беларусі.
Мікалай Радзівіл Чорны з’яўляўся адным з лідараў руху Рэфармацыі, што ахапіў нашу краіну ў XVI ст., прадстаўнікамі якога з’яўляюцца Францыск Скарына, Сымон Будны, Васіль Цяпінскі і многія іншыя славутыя постаці айчыннай гісторыі. Дзеянне спектакля ахоплівае 2 гады ‑ з 1551 па 1553 г. П’еса прысвечана складанаму выбару ў жыцці маладога канцлера. У выніку, ён цвёрда вырашае ісці па шляху служэння Богу і Айчыне.
Спектакль рыхтуе творчы калектыў пад кіраўніцтвам лаўрэата Нацыянальнай тэатральнай прэміі Беларусі, актора і рэжысёра Нацыянальнага акадэмічнага тэатра імя Янкі Купалы П.Харланчука-Южакова. Аўтар сцэнарыя – кандыдат гістарычных навук, загадчык аддзела гісторыі беларускай дзяржаўнасці Інстытута гісторыі НАН Беларусі А.У.Унучак. У спектаклі задзейнічаны: П.Харланчук-Южакоў, Г.Харланчук-Южакова, У.Козічаў, С.Елісеева, В.Козел, А.Золатаў, А.Рукаль.
Касса: вт.-сб.: с 14.00 до 19.00; вс.: с 11.00 до 19.00; пн.: выходной; +375 152 72 34 27
80 000 руб.