Спектакль «Я вольны!»

Паводле рамана «Касметыка ворага» Амелі Натомб.
Метафізічны трылер на 1-у дзею.
Прэм'ера - 21 студзеня 2014 года.
Камерная сцэна.

Чаму мы забіваем тое, што больш за ўсё любім? Раз за разам чалавецтва задае сабе гэтае пытанне і не можа знайсці адказу. Свой варыянт прапануе рэжысёр Аляксандр Дольнікаў (Расія, Масква). Спектакль «Я вольны!» – першая ў Беларусі пастаноўка паводле рамана «Касметыка ворага» Амелі Натомб, самай знакамітай на сёння франкамоўнай пісьменніцы. Яе творы перакладзены больш чым на 30 моў свету.

У парыжскім аэрапорце затрымліваецца рэйс на Барселону. Адзін з пасажыраў, Жэром Ангюст, падрыхтаваўся да доўгага чакання, выцягнуў кнігу, але пачытаць не атрымліваецца. Да яго падсаджваецца нейкі мсье Тэкстор Тэксэль і распачынае непрыемную шчырую размову пра сваё жыццё. Агідныя прызнанні, разважанні пра Бога, прыхаваныя пачуцці… І вядома – каханне, якое мяжуе са смерцю… Слова за словам героі апускаюцца на цёмнае дно чалавечай сутнасці, адчыняюць дзверы, якія, магчыма, і не варта адчыняць…

Пераклад Алеся Замкоўскага
Інсцэніроўка, сцэнаграфія, музычнае афармленне і пастаноўка Аляксандра Дольнiкава (Расія, Масква)
Касцюмы Святланы Макаранка

Дзейныя асобы i выканаўцы:

Жэром Ангюст - заслужаны артыст Рэспублікі Беларусь Георгій Лойка
Тэкстор Тэксэль - Святлана Жукоўская

Працягласць спектакля - 1 гадзіна без антракту.