24 студзеня а 12-й гадзіне ў Дзяржаўным літаратурна-мемарыяльным музеі Якуба Коласа адбудзецца ўрачыстая цырымонія падвядзення вынікаў конкурсу творчых работ “І складаюцца самыя дзівосныя казкі…”.
Конкурс праходзіў з 21 лістапада 2016 года па 31 снежня 2016 года. У конкурсе прынялі ўдзел дзеці ад шасці да васямнаццаці гадоў. На адрас музея прыйшло каля чатырохсот работ з усіх рэгіёнаў Беларусі, якія ў мастацкай форме адлюстоўваюць уяўленні сучаснай моладзі пра герояў твораў Якуба Коласа.
Работы ацэньваліся па ўзроставых катэгорыях у двух асноўных намінацыях:
- конкурс выяўленчага мастацтва;
- літаратурны конкурс.
На конкурс выяўленчага мастацтва былі прадастаўлены малюнкі, паштоўкі, пано, вышыванкі, вырабы з керамікі, салёнага цеста, лялькі, выцінанкі. Ва ўсіх работах увасоблена дзіцячае ўяўленне і бачанне герояў твораў Якуба Коласа, іх выяўленне сродкамі выяўленчага і дэкаратыўна-прыкладнога мастацтва.
На літаратурны конкурс прыйшлі казкі, эсэ, замалёўкі, літаратурная крытыка, сачыненні, у якіх удзельнікі конкурсу разважаюць пра значэнне творчасці Якуба Коласа ў беларускай літаратуры, дзеляцца сваімі ўражаннямі ад прачытаных твораў класіка, спрабуюць свае ўласныя пісьменніцкія сілы.
У журы конкурсу былі запрошаны вядомыя беларускія паэты, мастакі і дзеячы культуры.
Лаўрэаты конкурсу і госці музея змогуць пабачыць у залах музея “ажыўшую” экспазіцыю, на якой прадэманструюцца вузлавыя моманты жыцця і творчасці Якуба Коласа.
На ўрачыстай цырымоніі ўзнагароджання члены журы павіншуюць пераможцаў, уручаць дыпломы і памятныя падарункі.
Тэл. для даведак: +375 (17) 284-17-02.