18 кастрычніка а 16:00 гадзіне ў Дзяржаўным літаратурна-мемарыяльным музеі Якуба Коласа адбудзецца творчы вечар Ганада Чарказяна “Знайсці сваю дарогу ў жыцці”, прымеркаваны да юбілею пісьменніка.
Ганад Чарказян (курд.Qanatе Carkazyan) - паэт, пісьменнік, празаік, перакладчык. Нарадзіўся Ганад Бадрыевіч ў Арменіі, у Арарацкай даліне, куды, ратуючыся ад бяды-ліха, калісьці прыйшоў з Турцыі яго дзед, курд па нацыянальнасці. Лёс закінуў яго ўнука ў Беларусь. Ён працаваў, вучыўся, скончыў Беларускі політэхнічны інстытут. Шмат пісаў. «Спагадны лёс» звёў Ганада Чарказяна з Петрусём Броўкам, Рыгорам Барадуліным, Васілём Быкавым і многімі іншымі пісьменнікамі рэспублікі. Беларусь стала другой радзімай Ганада Бадрыевіча, і ён аддзячыў ёй за прытулак, дабрыню і сардэчнасць светлымі вершамі і паэтычнай прозай.
Ганад Чарказян піша на беларускай, курдскай і рускай мовах. Першая кніга яго вершаў "Трываласць" (1980) выйшла ў Мінску. На рускую мову яе пераклаў Валерый Ліпневіч. З тых часоў у аўтара выйшла больш за 20 кніг паэзіі і прозы на беларускай і рускай мовах. У розныя гады Ганада Чарказяна перакладалі Фёдар Яфімаў, Валянцін Тарас, Барыс Крывялевіч, Глеб Артханаў, Рыгор Барадулін, Ала Канапелька, Кастусь Жук, Казімір Камейша, Іван Бурса. Асобныя вершы з'яўляліся ў перакладзе на шведскую, англійскую, іспанскую, арабскую, японскую мовы і хіндзі.
На творчым вечары прагучаць творы не толькі самаго юбіляра, але і паплечнікаў па пяру Ганада Бадрыевіча – Васіля Быкава і Рыгора Барадуліна (дзякуючы сямейнаму відэархіву), а таксама Міхася Пазнякова, Міколы Мятліцкага, Алеся Марціновіча, Казіміра Камейшы і іншых.
Спецыяльна да мерапрыемства падрыхтавана выстаўка з асабістага архіва Ганада Чарказяна, на якой будуць прадстаўлены выданні твораў пісьменніка розных гадоў, кнігі класікаў беларускай літаратуры – Петруся Броўкі, Васіля Быкава, Івана Шамякіна, Рыгора Барадуліна з аўтографамі, а таксама іх падарункі юбіляру, фотаздымкі, ганаровыя граматы і разнастайныя публікацыі.
Сардэчна запрашаем!
Адрас музея: г. Мінск, вул. Акадэмічная, 5
Тэл. для даведак: +375 17 284-15-84, +375 17 284-17-02
Афіцыйны сайт: www.yakubkolas.by