Вялікі ўрок сацыяльнага праекта «Чытаем па-беларуску з velcom» пройдзе ў мінскім парку
Спецыяльны вялікі ўрок адукацыйнага праекта «Чытаем па-беларуску з velcom» пройдзе на адкрытым паветры ў парку імя Янкі Купалы 28 мая. Мерапрыемства збярэ больш за 200 мінскіх школьнікаў. У незвычайным уроку прымуць удзел настаўнікі праекта – беларускія пісьменнікі і паэты Уладзімір Ліпскі, Раіса Баравікова, Таццяна Сівец і Алёна Масла. Спецыяльныя госці – вядомыя беларускія футбалісты Віталь Радзівонаў і Васіль Хамутоўскі, а таксама прадстаўнікі Міністэрства адукацыі, Міністэрства культуры і Мінгарвыканкама.
Літаратары, прадстаўнікі органаў улады, спартоўцы і вучні мінскіх школ прачытаюць урыўкі з твораў беларускіх пісьменнікаў і паэтаў, чые юбілеі святкуе Беларусь сёлета: Максіма Багдановіча, Цёткі, Кандрата Крапівы, Змітрака Бядулі, Івана Шамякіна, Івана Мележа. Побач з помнікам Янке Купале прагучаць і вершы паэта. Настаўнікам незвычайнага адкрытага ўроку "Чытаем па-беларуску з velcom" стане вядучы Белтэлерадыёкампаніі Яўген Перлін. Ініцыятарам мерапрыемства выступіла кампанія velcom пры падтрымцы Міністэрства адукацыі і Міністэрства культуры, Мінгарвыканкама, Нацыянальнага цэнтра сучасных мастацтваў.
Галоўная задача праекта "Чытаем па-беларуску з velcom" - папулярызацыя беларускай мовы і культуры. За час свайго існавання ініцыятыва аб'яднала мноства неабыякавых да роднай мовы людзей розных пакаленняў. На уроках праекта школьнікі знаёмяцца з сучаснымі пісьменнікамі і іх творамі. 28 мая ў парку імя Янкі Купалы ў цэнтры ўвагі будуць творы славутых класікаў беларускай літаратуры, якія шмат зрабілі для станаўлення роднай мовы, літаратуры і культуры.
Адкрыты ўрок ў парку імя Янкі Купалы завяршае першы навучальны год сацыяльнага адукацыйнага праекта "Чытаем па-беларуску з velcom". Першы ўрок сацыяльнай ініцыятывы адбыўся ў кастрычніку ў Мінску, і на працягу 3 месяцаў больш чым ў 30 сталічных школах прайшлі ўрокі па спецыяльна распрацаванай праграме. У красавіку і ў маі 2016 года праект працягнуўся ў рэгіёнах Беларусі. Вучні 2-3 класаў 26 школ Гомельскай вобласці атрымалі дадатковыя веды па беларускай мове, культуры і літаратуры.
Працяг адукацыйнага праекта плануецца напачатку новага навучальнага года ў школах Брэста і Бресцкай вобласці. У агульнай складанасці 150 школ і больш за 15 000 вучняў па ўсёй Беларусі прымуць удзел у сацыяльнай адукацыйнай ініцыятыве "Чытаем па-беларуску з velcom".