У імпрэзе возьмуць удзел перакладчыца і літаратурны крытык Ганна Янкута, перакладчыца Кацярына Маціеўская, паэт, перакладчык, музыка Уладзь Лянкевіч. Пра Юліну творчасць і «Кнігу памылак распавядзе рэдактар кнігі Альгерд Бахарэвіч. Віртуальнае прывітанне аўтарцы і чытачам кнігі перадасьць беларуская паэтка Вальжына Морт, якая жыве ў ЗША. На прэзентацыі можна будзе пачуць вершы ў выкананні аўтаркі, як тыя, што ўвайшлі ў кнігу, так і зусім новыя, а таксама атрымаць адказы на пытанні.
Крыху пра кнігу.
Вершы Юлі Цімафеевай друкаваліся на старонках самых розных выданняў, гучалі на слэмах і літаратурных фестывалях, як у Беларусі, так і за мяжой, зь імі можна было пазнаёміцца і ў сеціве. І вось нарэшце найлепшыя зь іх сабраныя пад адной вокладкай – «прыгожай і жарснай». «Кніга памылак» выйшла ў 2014 годзе ў выдавецтве «Галіяфы». У зборнік увайшлі як арыгінальныя вершы, так і пераклады замежнай паэзіі.