23 лістапада а 16-й гадзіне ў галерэі «Лабірынт» Нацыянальнай бібліятэкі Беларусі адбудзецца прэзентацыя кнігі С.М. Клімава «Базыльяне».
Арганізатарамі мерапрыемства выступілі Нацыянальная бібліятэка Беларусі і Нацыянальны гісторыка-культурны музей-запаведнік «Нясвіж».
Гісторыя базыльянаў на тэрыторыі Вялікага Княства Літоўскага бярэ пачатак з 1617 года, калі ўніяцкі мітрапаліт Язэп Руцкі, рэфармуючы манастырскае жыццё сваёй царквы, стварыў ордэн св. Базыля Вялікага. Гісторыя гэтага ордэна, як і гісторыя другіх каталіцкіх ордэнаў, існаваўшых на беларускіх землях, мала вядома.
Аўтар манаграфіі, кандыдат гістарычных навук, дырэктар Нацыянальнага гісторыка-культурнага музея-запаведніка «Нясвіж» Сяргей Міхайлавіч Клімаў сваім даследаваннем імкнуўся запоўніць прабелы ў гісторыі манахаў-базыльянаў у найбольш складаны перыяд дзейнасці ордэна ў 70-х гг. XVIII ст. - 30-х гг. ХІХ ст. менавіта на землях Вялікага Княства Літоўскага. Гэты перыяд уяўляецца даследчыку надзвычайна важным для разумення ролі, якую базыльяне на працягу ўсёй сваёй гісторыі гралі ў літоўска-беларускім грамадстве.
Даследаванне было праведзена ў межах навуковага праекта Інстытута Сярэдне-Усходняй Еўропы пад кіраўніцтвам прафесара Ежы Клачоўскага (Рэспубліка Польша).
Кніга адрасавана гісторыкам, выкладчыкам, студэнтам, а таксама ўсім тым, хто цікавіцца беларускай гісторыяй.
Тэл. для даведак: 293-27-67
Е-mail: pr@nlb.by
Прасп. Незалежнасці, 116, 3-ці паверх