Сатырычна-гумарыстычны калейдаскоп па творах Кандрата Крапівы.
Аўтар і выканаўца – Зінаіда Феакцістава-Каладзяжная
Рэжысёр-пастаноўшчык – Вітаўтас Грыгалюнас
Шаноўныя аматары мастацкага слова!
18 лютага гэтага года ў Малой зале імя Р.Шырмы Беларускай дзяржаўнай філармоніі адбудзецца прэм’ера, якую рыхтуе нястомны прапагандыст айчыннай класікі Зінаіда Феакцістава-Каладзяжная.
Слухачы памятаюць яе па шматлікіх монаспектаклях: «Ягадны хутар» (Я.Янішчыц), «Цунамі» (А.Куляшоў), «Прайсці праз вернасць» (М.Танк).
На гэты раз артыстка спрабуе ўзяць яшчэ адну прыступку на высокай лесвіцы Слова.
«Я – пякучка-крапіва» – сатырычна-гумарыстычны калейдаскоп па творах народнага пісьменніка Беларусі; акадэміка К.Крапівы.
«Я пачынала сваю творчасць у Беларускай дзяржаўнай філармоніі менавіта з баек К.Крапівы – успамінае артыстка. Тады я працавала ў творчай групе маёй таленавітай настаўніцы Г.П.Рыжковай, “каралевы беларускага гумару”. Я прайшла ў яе вялікую школу. Інтанацыі яе помню да сёняшняга дня».
У праграме прагучаць вершы, жарты, байкі, частушкі-чыстушкі.
Рэжысёр-пастаноўшчык - вядомы дзеяч культуры і мастацтваў Вітаўтас Грыгалюнас.
Слухачоў чакаюць імправізацыі, сюрпрызы, яны прымуць актыўны ўдзел у гэтай імпрэзе.
Таму, рыхтуйцеся калі ласка!